ZOYENERA KUCHITA PA MALO OGWIRA NTCHITO

Malo ogwirira ntchito ali ngati  nyambo mmanja mwa mnsodzi ndipo kugwira ntchito kumayika chimwemwe mtsaya pomwe malipiro akuperekedwa.Komatu kuzindikira ntchito yako  nkofunika pa Kampani kapena bungwe  limene munthu akuligwirira ntchito.

Mkulu ochokera ku Bungwe lolimbikitsa luso  losiyanasiyana pakati pa achinyamata la CISE Malawi, a Davis Damison, wafotokoza kuti  ndikofunikira kwambiri  ngati bungwe kapena kampani  kudziwa zolinga zawo ndipo anthu ogwira ntchito  akuyenera kumadziwa  zolinga za kampani kapena bungwe lawo.”Anthu akuyenera kudziwa zolinga za kampani kapena bungwe zazikulu ndi zazing’ono. Naye munthu ogwira ntchito akuyenera kukwaniritsa Masomphenya a kampani kapena bungwe  komanso iye mwini ngati munthu”.

Damison ,  wati kudziwika pa ntchito  ndi udindo wako nkofunika kwambiri kaamba koti kumathandizira kupereka chikhulupiliro kwa anthu ena komanso ogwira nawo ntchito pomwepo kuti kupereka maganizo,kuthokozedwa kudziyendanda bwino.Mkuluyu, wadzudzula  anthu ena omwe amadzitcha okha ngati  mabwana  zomwe zimapereka chiphamaso komanso kukhalira  ziganizo pa ntchito.

Pothirirapo ndemanga pa zomwe mabwana amayang’anira kwa ogwira ntchito ake,Damison  wati mabwana mma kampani kapena mabungwe amayang’anira zimene ogwira ntchito analemba kuti akwaniritsa kumayambiriro kwa chaka.”Zolinga za mabwana zimadziwikiratu kumayambiriro kwa ntchito. Kwambiri mabwana  amayang’anira masomphenya amene munthu wayika kuti akwaniritse pakutha pa miyezi khumi ndi iwiri”. Iye,wafotokoza.

A Damison, ati eni kampani ndi mabungwe  akuyenera kupereka maphunziro a luso lopitirira( (continouus profession development)kwa anthu ogwira ntchito ake ndicholinga chofuna kupititsa patsogolo ntchito zake. Damison,wati izi zìmalimbikitsa  kuti  munthu akhale namandwa pothandizira mabungwe kapena kampani, kuti ntchito zake zipite patsogolo.

Mkulu wa Bungwe  la CISE Malawi-yu, wayamikira ndondomeko ya uthenga wa makono( e-mail),kuimba lamya  koma mobisa dzina la yemwe wapereka nkhawa zake komanso poika kabokosi kokuti anthu adziikamo nkhawa zawo pa momwe kampani kapena mabungwe akugwilira ntchito.

Davis Damison , wafotokoza kuti ma lipoti  a momwe anthu ogwira ntchito  amayenera kulemba  pa momwe agwilira ntchito  ndi ofunikira kwambiri  kwa mabwana. “Malipoti  ndi ofunikira kwambiri chifukwa  zimathandizira kuwona momwe ntchito  ikuyendera ,amathandiza kupanga ziganizo  ndi kudziwa maluso ena omwe ogwira ntchito alinawo. Lipoti  limadutsa pa zomwe munthu analemba kuti zikwaniritsidwa pa mwezi kapena pa chaka “.

Damison, wapempha anthu omwe akufuna ntchito kuti adziyesetsa kusunga zinthu ngati kalankhulidwe ndi kavalidwe ka  momwe bungwe kapena kampani  zimachitira.

Kafukufuku akusonyeza kuti  dziko lino liri pa mlingo wa 67.86 percent  wa anthu ogwira ntchito.